У дзіцячым садзе педагогі робяць шмат таго, што часта не па сілах арганізаваць бацькам у хатніх умовах. Ці не таму мамы і таты ўсё часцей аддаюць сваіх дзяцей пад нагляд прафесійных выхавальнікаў, нават калі ў гэтым, здавалася б, няма вострай неабходнасці? Бо менавіта ў садзе ствараюцца ўмовы для разумовага і фізічнага развіцця дзіцяці.
16 лютага 2015 года ў ДУА “Хараўскі дзіцячы сад №34” праведзены адкрыты занятак з мэтай вырашэння гадавой задачы ўстановы па развіццю маўлення выхаванцаў праз тэатральна-гульнявую дзейнасць. У старэйшай групе выхавальнік вышэйшай кваліфікацыйнай катэгорыі Арцямук Алена Мікалаеўна са сваімі выхаванцамі ўспомнілі беларускія вершы, прыказкі аб любімай радзіме, загадалі загадкі для гасцей (дзяцей малодшай групы і педагогаў) і паказалі гульню-драматызацыю “Рукавічка”.
Шмат разоў выхавальнікам прыходзіцца адказваць на такія пытанні бацькоў: “ Як паводзіць сябе маё дзіця на занятках? Як спраўляецца з заданнямі? Ці не адстае ад другіх?”
Усе гэтыя пытанні бацькі прама звязваюць з падрыхтоўкай да школы. Амаль ніхто не задаў пытанне : “ А як гуляе маё дзіця? Ці ўмее гуляць у розныя гульні?” У прадстаўленні многіх дарослых падрыхтоўка да навучання ў школе і гульня – рэчы несумяшчальныя. Часта даводзіцца чуць : “Колькі можна гуляць, займіцеся справаю!” Выходзіць, што гульня – гэта свавольства, пустая трата часу. А на самой справе гэта не так.